ذكريات شااااااااااايب !؟

ذكريات شايب
هذا سلمكم الله أحد الشيبان حب يشارك معكم بذكريات شايب ولأنه ما يعرف للنت حيل وما هو مشارك كلفني أروي الذكريات على إلسانه ويقول إذا أعجبتهم عندي منها واجد وفيه صور راح أنزلها قديمه حيل ومعي بها ناس يمكن ما تعرفونهم وهم أقرب الناس لكم

نبدأ بالقسم الأول من الذكريات

1 _ أول ما بدأت الدراسه كان الوالد رحمه الله يوديني بالحصنيه للمدرسه وكانت مدرسة أسامه بن زيد ويوقفها عند السده والسده هذه حافة الشعيب ونروح على رجلينا للمدرسه
وثاني أيام الدراسه أحد المعلمين الأجانب مسك إذن طالب عندنا وأخذت إذنه تصب دم وهو قاعد يصيح ويقوول والله لأعلم أبوي يجيك يدعسك بالسياره الوكاد حنا إنهبلنا وخفنا من المدرسه والمدرس هذا شكله إحتاس وخاف حيل

المهم ما هي إلا أيام ونقلنا للفيصليه حيث تم إفتتاح مدرسة الفيصليه في بيت مستأجر وإفتكينا من هالمعلم البلشه

2- كان فيه عندنا معلم إسمه حكمت إسماعيل ( الله يذكره بالخير ويسامحه)

طبعا ما كان يدرسنا ولا نعرفه جاء ومعه عصى ويضرب الطاولات ويقول والله بكره لأسمع لكم الإنشوده وأللي ماهو حافظ والله لأفرشه وأعلقه بالمروحه

طبعا انا نسيت الموضوع وماتذكرت إلا بالليل وماحفظت طبعا خفت وأنا كنت عند عمة لي والوالد بالبر

يا ولد وش الحيله خطرت عليه فكرت إني أغيب !! طيب وش أقول لعمتي؟
المهم جتنى فكره وقلت لها ياعمه ترى ماني مداوم بكره
قالت ليش ؟ قلت حنا يالشاطرين عطونا إجازه وبكره بس التيوس أللي يدرسون ( والله ماني بسيط ذكي !!)
مشت على العجوز !! اليوم أللي أنا غايب فيه من حسن الحض جاء الوالد من البر وكان حارس المدرسه من جماعتنا طبعا أنا قلت للوالد القصه إني من الشاطرين ومجاز وأنا فعلا من الشاطرين بس ماني مجاز !!

المهم سأل الحارس أبوي ليش الولد ما درس قال والله يقول ماعندهم مدرسه طبعا إنكشفت وتعال ياولد وخذ هالترزيله من الوالد وأخذها عليه الله يغفر له ويرحمه يمازحني بها دايم


[color="black"]3_ فيه مره داومت يوم الخميس للمدرسه
وهذه القصه طبعا قعدتني عمتي وأخذت شنطتي ويالله مشي طبعا الممشى من تلعت السويلمات إلي مدرسة الفيصليه وكانت عند مستوصف الشلخان أللي هو مستوصف الفيصليه ، مسافه والله وقبل المدرسه فيه عيال بسني يلعبون وسألني واحد وين رايح قلت للمدرسه قال اليوم خميس مافيه مدرسه وأخوك بالله توه يستقعد
وأنا أدق ريوس مع أثري للبيت لن أنساها كأنها اليوم

4- طبعا كل إنسان عند روحه عنتر
هذا سلمكم الله أحد قرابتي جاء يساعدني وخي الغصب وأنا ماني مشتهي المهم كتب عني واجب القراءه طبعا هو حاط نفسه أشطر مني وأذكى مني
المهم عطيت المعلم الواجب باليوم التالي وعينك ما تشوف إلا النور بالراشدي وأنا أفر أنت حايس لي الدنيا حوس ليش عمى ما تشوف
ليه يا أستاذ!!!؟؟
أثري الأخ حايس الدنيا فعلا كلمه صح وعشره خطأ وماهو الدرس المطلوب !!!!!![/color] إلى لقاء مع ذكريات شايب